Transfermarkt portali Messi va Ronalduning transfer qiymatlari teng degan xulosaga keldi

Transfermarkt portali dunyoning ayni paytdagi eng qimmatbaho futbolchilari narxlarini e’lon qildi, deb xabar bermoqda “Stadion.uz”. Eng qimmat futbolchilar TOP-10 ligini sizga taqdim etamiz.

9-10. Luka Modrich

• Klubi: “Real Madrid”
• Narxi: 55 mln yevro
• Yoshi: 29

Modrich so‘nggi 2 yil ichida dunyoning eng kuchli yarim himoyachilaridan biriga aylandi. Xorvatiyalik futbolchi «Real»ning so‘nggi muvaffaqiyatlari muxim ahamiyat kasb etdi. Luka 29 yoshda bo‘lishiga qaramasdan dunyoning eng qimmat futbolchilari ro‘yhatida kuchli o‘nlikdan joy olganligi shunchaki tahsinga sazovordir.

9-10. Falkao

• Klubi: “Manchester Yunayted”
• Narxi: 55 mln yevro
• Yoshi: 28

Kolumbiyalik hujumchi so‘nggi paytlarda unchalik ham yorqin o‘yin namoyish qila olmayotgan bo‘lsa ham, narxi haliyam baland. Falkao sayt ijodkorlari tomonidan 55 mln yevroga baholanmoqda. Radamel jarohatlardan forig‘ bo‘ldi va endi tezda gollar urishni boshlab yubormasa, narxi keskin tarzda pasayib ketishi mumkin.

8. Edison Kavani

• Klubi: “PSJ”
• Narxi: 57 mln yevro
• Yoshi: 27

Kavani “PSJ”da Ibragimovichning soyasida qolib ketayotgandek. Urugvaylik hujumchining bugungi holati 57 mln yevroga baholanmoqda. Agar u o‘zini yanada yaxshi tomonlama ko‘rsata olsa, kamida 70 mln yevroga baholanishi mumkin. Ajab emaski, Edison yangi mavsumni yangi jamoa safida boshlasa.

6-7. Luis Suares

• Klubi: “Barselona”
• Narxi: 60 mln yevro
• Yoshi: 27

Urugvaylik yana bir superhujumchi Suaresning narxi 60 mln yevro deb baxolangan. Luis hozircha “Barselona” safida o‘zini ko‘rsatib ulgurganicha yo’q. Agar u Kataloniyaliklar safida “Liverpul”dagi o‘yinlarini namoyish qilsa, kamida kuchli beshlikka kirishi mumkin. Ko‘raylikchi Suares “Barselona” muxlislarining ham yoqimtoyiga aylana olarmikan?

6-7. Xames Rodriges

• Klubi: “Real Madrid”
• Narxi: 60 mln yevro
• Yoshi: 23

Kolumbiyalik yarim himoyachi Xames ham 60 mln yevroga baholangan. Rodriges yozda “Real”ga 80 mln yevroga tushgan edi. U yangi jamoasida ham “yo‘qolib” qolmadi va bugungi kunda Madridliklarning yetakchilaridan biriga aylanib ulgurdi. Xamesning 23 yoshda ekanligini inobatga olsak, uning narxa hali yanada balandlashi mumkin.

5. Anxel Di Mariya

• Klubi: “Manchester Yunayted”
• Narxi: 65 mln yevro
• Yoshi: 26

Di Mariya Angliyaga tezda moslashib ketdi va bugungi kunda “Manchester Yunayted” ishqibozlarining sevimli futbolchisiga aylanib ulgurdi. Dima sayt tomonidan 65 mln yevroga baholangan. Anxel “qizil iblislar” bilan katta muvaffaqiyatlarga erishsa, kamida uchlikka kirish imkoniyatiga ega.

4. Neymar

• Klubi: “Barselona”
• Narxi: 70 mln yevro
• Yoshi: 22

Kuchli o‘nlikdan joy olgan futbolchilar orasida eng yoshi Neymardir. Braziliyalik hujumchi 70 million yevroga baholangan. Neymar ayniqsa 2014-yilni yuqori saviyada o‘tkazdi va undan muxlislarning ushbu yilda umidlari katta. “Barselona” hujumchisi kelajakda ushbu reytingni boshqarib borishini taxmin qilish mumkin.

3. Garet Beyl

• Klubi: “Real Madrid”
• Narxi: 80 mln yevro
• Yoshi: 25

So‘ngi paytlarda Beylning transferi haqida gap so‘zlar ancha ko‘payib ketgan edi. Madridliklar Uelslik futbolchini 300 mln yevroga ham sotmasliklarini e’lon qilishgan. Garetning bugungi kundagi bahosi 80 mln yevroga tenglanmoqda. Beylning o‘yinlarida oxirgi vaqtlarda biroz pasayish yuzaga kelgandek. Biroq bu futbolchining narxiga ta’sir o‘tkazmadi.

1-2. Krishtianu Ronaldu

Klubi: “Real Madrid”

Narxi: 120 mln yevro

Yoshi: 29

Ronaldu so‘nggi ikki mavsumda super o‘yinlari orqali dunyoning eng qimmat futbolchilari ro‘yhatida nihoyat yuqorilashga erishdi. U 4 yil mobaynida bu ro‘yhatda 2-o‘rindan joy olib kelayotgan edi. Endi esa u Messi bilan birgalikda qo‘shhokimlik qilmoqda. Ronaldu ham bu natijaga 29 yoshida erishganligini alohida ta’kidlab o‘tmoq joiz.

1-2. Lionel Messi

• Klubi: “Barselona”
• Narxi: 120 mln yevro
• Yoshi: 27

Ortda qolgan ikki yil davomida Messining o‘yinida biroz pasayish kuzatildi. Biroq u hali hamon boshqa futbolchilarga qaraganda ko‘proq gol urmoqda, ko‘proq golli uzatmalarni amalga oshirmoqda. Leo ham huddi Krish singari 120 mln yevroga baholanmoqda. Lekin “Barsa” uni bu narxda sotmasa kerak. Har xolda so‘nggi yangiliklarda klub uni 220 mln yevroga sotishi mumkinligi qayd etilgan. Agar biror klub unga shuncha summa taklif qilsa, argentinalik futbolchi jahonda eng qimmat transfer qilingan futbolchi sifatida tarix sahifalaridan joy olishi mumkin.

Kuchli 20 talikdan shuningdek Tomas Myuller (50 mln yevro), Robert Levandovski (50 mln yevro), Marko Roys (50 mln yevro), Mario Gyotse (48 mln yevro), Eden Azar (48 mln yevro), Pol Pogba (45 mln yevro), Xalk (45 mln yevro), Arturo Vidal (45 mln yevro), Mesut O‘zil (45 mln yevro), Toni Kroos (45 mln yevro) kabi futbolchilar joy olishgan.