O‘zbekiston va Iroq terma jamoalari o‘rtasidagi ikkinchi o‘yinda hisob ochilmadi

BAAning Sharja shahrida bo‘lib o‘tgan O‘zbekiston va Iroq terma jamoalari o‘rtasidagi ikkinchi o‘rtoqlik uchrashuvida hisob ochilmadi − 0:0. Bu haqda O‘zbekiston Futbol federatsiyasi matbuot xizmati xabar berdi.

Osiyo Kubogiga tayyorgarlik ko‘rayotgan O‘zbekiston milliy terma jamoasi bugun BAAning Sharja shahrida Iroq terma jamoasiga qarshi ikkinchi o‘rtoqlik uchrashuvida maydonga tushdi. Qiziqarli va kurashlarga boy uchrashuvda darvozalarga gol kiritilmadi va o‘yin 0:0 hisobida yakunlandi. Ta’kidlash lozim, uchrashuvning birinchi bo‘limi 21-daqiqasida Server Jeparov penaltidan raqib darvozasini ishg‘ol qila olmadi.

Milliy terma jamoa bosh murabbiyi ilk o‘yin bilan taqqoslaganda tarkibda bir qator o‘zgarishlarni amalga oshirdi. Jumladan, milliy terma jamoa sardori Server Jeparov yana terma jamoani sardor sifatida maydonga olib tushgan bo‘lsa, “Krasnodar” klubi a’zosi Odil Ahmedov bir necha haftalik muddatdan so‘ng jarohatidan tuzalib asosiy tarkibda maydonga tushdi.

Avvalgi uchrashuvda yagona gol muallifiga aylangan Jamshid Iskanderov esa ikkinchi bo‘limda maydonga tushdi. Eslatib o‘tamiz, 25-dekabr kuni bo‘lib o‘tgan terma jamoalar o‘rtasidagi ilk uchrashuvda 1:0 hisobida Mirjalol Qosimov shogirdlari g‘alaba qozongan edilar.

Mirjalol Qosimov bosh murabbiyligidagi milliy terma jamoa 29-dekabr kuni Toshkentga qaytib keladi. O‘zbekiston terma jamoasi Osiyo Kubogida ishtirok etish uchun 3-yanvar kuni Avstraliyaning Sidney shahriga uchib ketadi.

O‘rtoqlik uchrashuvi. 28 dekabr. Sharja, BAA.

O‘zbekiston - Iroq 0:0

Amalga oshirilmagan penalti: Server Jeparov 21 (darvozabon)

O‘zbekiston: 12. Ignatiy Nesterov, 19. Vitaliy Denisov (22. Farruh Sayfiyev, 75), 5. Anzur Ismoilov, 3. Shavkat Mullajonov (20. Islom To‘xtaxo‘jayev, 60), 28. Shuhrat Muhammadiyev, 7. Azizbek Haydarov, 18. Timur Kapadze (10. Jamshid Iskanderov, 75), 9. Odil Ahmedov (13. Lutfulla To‘rayev, 60), 8. Server Jeparov (17. Sanjar Tursunov, 60), 14. Sardor Rashidov, 15. Vohid Shodiyev (11. Navro‘zbek Alimov, 79).

Iroq: 12. Jalol Hassan, 2. Ahmad Ibrohim, 9. Ahmad Yasin (11. Humam Tariq, 61), 10. Yunus Mahmud (25. Marvan Husin, 66), 14. Salom Shokir, 15. Durgam Ismoil, 18. Mahdi Karim (6. Samih Said, 69), 19. Mahdi Kamil, 21. Saad Abdul Amir, 24. Amjad Halaf (16. Jastun Hekmat, 72), 26. Osama Jabbor.

Ogohlantirishlar: Aziz Haydarov 59, Lutfulla To‘rayev 62, Samih Said 78.