Nursulton Nazarboyev 10 yoshli bolaning maktubiga javob yozdi

Qozog‘iston Respublikasi Prezidenti Nursulton Nazarboyev olma-otalik 10 yoshli Yerjan Isabayevning maktubiga shaxsan javob yozdi, deb xabar bermoqda Nur.kz.

Ikkala xatni ham bolaning otasi Baurjon Isabayev o‘zining Facebook’dagi sahifasiga qo‘ygan. Yerjan o‘z xatida prezident bilan ikki yoshligida Olma-otada uchrashganini, qarindoshlari uni shaxsan prezident ko‘targani sababli boshqacha bola ekanligini hozirgacha aytib yurishlarini yozgan.

Nazarboyevni o‘zining tug‘ilgan kuniga taklif qilgan Yerjan agar qachondir prezidentga yordam kerak bo‘lsa, u o‘z akasi bilan o‘sha zahoti yetib borishini aytgan.

Javob maktubida Nazarboyev Yerjanga maktub uchun minnatdorchilik bildirib, o‘z xalqiga xizmat qilish va Vatanni sevish eng katta baxt ekanligini esda tutishi va buni akasi Nurjanga yetkazishi lozimligini yozgan.