“O‘zbekiston havo yo‘llari” milliy aviakompaniyasi bort kuzatuvchisi lavozimini egallashni istagan qizlar uchun tanlov e’lon qiladi. Tanlov haqidagi batafsil ma’lumot kompaniya rasmiy saytida taqdim etildi.
Tanlovda 18—25 yoshdagi o‘zbek, rus va ingliz tilida so‘zlasha oladigan, bo‘yi 157—175 santimetr bo‘lgan, bo‘yiga mos vaznga ega O‘zbekiston Respublikasi fuqarolari ishtirok etishi mumkin. Nomzodlar kamida o‘rta-maxsus ma’lumotga ega bo‘lishi lozim.
Tanlovda ishtirok etishni istagan qizlar 27-oktabrdan 17-noyabrga qadar shanba va yakshanba kunlaridan tashqari har kuni soat 09:00 — 12:00 oralig‘ida kompaniyaning uchish majmuasida ariza topshirishi mumkin.
Tanlov 2014-yil 27-noyabr kuni bo‘lib o‘tadi. Unda nomzodlarning dunyoqarashi va umumiy bilimiga alohida e’tibor qaratiladi. Nomzod qizlardan O‘zbekiston tarixi va geografiyasi, tarixiy joylar, tarixiy va milliy qahramonlar haqidagi ma’lumotlar hamda jahon geografiyasini bilish talab etiladi.
Tanlovdan o‘tgan nomzodlar tibbiy ko‘rikdan o‘tkaziladi.
Barcha bosqichlardan muvaffaqiyatli o‘tgan qizlar milliy aviakompaniyaning Toshkent shahridagi O‘quv-mashg‘ulot markazida tahsil oladi.
Tanlovning qolgan shartlari va nomzodlarga qo‘yilgan boshqa talablar bilan milliy aviakompaniyaning rasmiy saytida tanishish mumkin.
Izoh (0)