16-oktabr kuni bo‘lib o‘tgan Apple taqdimotida yangi Apple iPad Air 2 plansheti rasman taqdim etildi. Bu haqda Phonearena.com ma’lumotiga asoslanib “Parol” nashri xabar berdi.
Ushbu planshet 6,1 mm qalinlikka ega va shu bois u “Dunyoning eng ingichka plansheti” nomini oldi. Eslatib o‘tamiz, undan oldingi iPad Air plansheti 7,5 mm qalinlikda edi. Shuningdek, yangi iPad plansheti 435 gramm og‘irlikda, undan oldingisi esa 454 gramm og‘irlikka ega bo‘lgan.
iPad Air 2 plansheti xuddi avvalgisi kabi 9,7 dyuymli displeyli, biroq uning displeyi to‘liq laminatlangan. Yangi planshetda TouchID — barmoq izi sensori o‘rnatilgan.
iPad Air 2’da 64 bitli, 3 milliard tranzistorga ega Apple A8X protsessori o‘rnatilgan. iPad Air’da esa 1 milliard tranzistorga ega Apple A7 protsessori o‘rnatilgan edi. iPhone 6 smartfonlaridagi Apple A8 protsessori esa 2 milliard tranzistorga ega. iPad Air 2 planshetining protsessori undan oldingisidan 40 foiz, video kartasi esa 2,5 barobar tez ishlaydi.
Yangi Apple planshetida Slow Motion — sekinlashtirilgan tasvir olish funksiyasi bilan 8 megapikselli kamera o‘rnatilgan, undan oldingisi esa 5 megapikselli kameraga ega edi. Bu kamera yordamida FullHD video tasvirga olish mumkin. Shuningdek, planshetning old kamerasi 1,2 megapikselli.
iPad Air 2 plansheti avvalgisidan ikki barobar tezroq ishlaydigan Wi-Fi’ga ega, uning yuklab olish tezligi soniyasiga 866 megabitni tashkil etadi. 4G LTE modulida internetning yuklash tezligi esa soniyasiga 150 megabitni tashkil etadi. iPad Air 2 plansheti ingichka bo‘lishiga qaramasdan, batareyasining quvvati 10 soatga yetadi.
Yangi iPad planshetini 17-oktabrdan boshlab buyurtma qilish, 24-oktabrdan esa sotib olish mumkin. Quyida uning narxlari bilan tanishing:
- 16 Gb xotirali iPad Air 2 Wi-Fi / LTE — 499 dollar / 629 dollar;
- 64 Gb xotirali iPad Air 2 Wi-Fi / LTE — 599 dollar / 729 dollar;
- 128 Gb xotirali iPad Air 2 Wi-Fi / LTE — 699 dollar / 829 dollar.
Izoh (0)