Bugun Bangkokdagi Golden Tulip mehmonxonasida U-16 o‘smirlar o‘rtasidagi Osiyo chempionati chorak finaliga yo‘l olgan barcha terma jamoalarning bosh murabbiylari ishtirokida o‘yinoldi matbuot anjumani o‘tkazildi, deb xabar bermoqda Uff.uz.
O‘zbekiston U-16 o‘smirlar terma jamoasi bosh murabbiyi Aleksandr Mochinov Suriya o‘smirlariga qarshi chorak final bahsida har ikkala terma jamoa futbolchilari maydonda oxirigacha kurash olib borishini ta’kidladi.
“Biz chorak finalda kuchli va ancha tezkor bo‘lgan jamoaga qarshi bahs olib boramiz. Uchrashuv biz uchun qanchalik muhim bo‘lsa, raqib uchun ham shunday muhimdir. Shunday ekan, ertaga biz uchun ortga yo‘l yo‘q. O‘yin biz uchun qanchalik muhim ekanligini his qilgan holda maydonga tushamiz”, — dedi Mochinov o‘yindan oldin o‘tkazilgan matbuot anjumanida.
“Raqib o‘yinini murabbiylar shtabi bilan birgalikda o‘rganib chiqdik. Ancha kuchli va tezkor o‘yin namoyish etadi. Biz ham raqib o‘yiniga qarab tayyorgarlik olib boramiz. Raqibning ma’lum bir futbolchilariga qarab alohida taktika tanlaymiz, deya olmayman. O‘yin boshidan o‘z o‘yinimizni ko‘rsatishga harakat qilamiz. O‘rtada jahon chempionati yo‘llanmasi turibdi, shunday ekan har ikkala jamoa ham oxirigacha o‘ynaydi. Balki ertaga hujumkor va chiroyli o‘yin guvohi bo‘lmassiz, balki jamoalar biroz ehtiyotkor o‘yin ko‘rsatishar, buni vaqt ko‘rsatadi”, — dedi O‘zbekiston o‘smirlar terma jamoasi bosh murabbiyi.
“Guruh o‘yinlarining barchasini Muangtong stadionida o‘tkazgan edik. Ertaga esa boshqa maydonda bahs olib boramiz. Umid qilamanki, bu holat bizga o‘yinda halal bermaydi. Murabbiylar ham, futbolchilar ham ertangi o‘yinning qanchalik muhim ekanini his qilib turibdi. Ular maydonga vatan sha’nini munosib himoya qilish uchun tushadi”, — dedi Mochinov.
Xabar berilganidek, U-16 o‘smirlar o‘rtasidagi OCh chorak finali doirasidagi O‘zbekiston va Suriya terma jamoalari o‘rtasidagi uchrashuv 14-sentabr, yakshanba kuni Bangkokdagi Rajamangala stadionida bo‘lib o‘tadi. Uchrashuv Toshkent vaqti bilan soat 18:00 da boshlanadi.
Eslatib o‘tamiz, O‘zbekiston terma jamoasi Osiyo chempionatining “C” guruhidagi uchrashuvlar natijasiga ko‘ra, guruhda birinchi o‘rinni qo‘lga kiritgan edi.
Izoh (0)