Irlandiyada yo‘lovchilar tiqilib qolgan o‘quvchi qizni qutqarish uchun tramvayni og‘dirdi (video)

Irlandiya poytaxti Dublin shahrida kunduzgi tig‘iz vaqtda o‘quvchi qiz yo‘l cheti va tramvay orasiga tiqilib qoldi. Bu haqda Sky News’ga tayanib, “RIA Novosti” xabar bermoqda.

Qizning o‘zi chiqa olmayotganini ko‘rgan yo‘lovchilar tramvayni og‘dirish uchun itara boshladi. Odamlar bir-birini “Itaring! Itarishda davom eting!” degan chaqiriqlar bilan tramvayni og‘dirishga undadi.

Voqeani videoga olayotgan yo‘lovchi ham biroz o‘tib, qizni qutqarishga yordam bera boshladi. Bir qancha urinishlardan so‘ng, yo‘lovchilar tramvayni o‘quvchi qiz qutilib chiqa olishi uchun kerak bo‘lgan masofaga surishga muvaffaq bo‘ldi.

“Qopqon”dan chiqarib olingan qiz shifoxonaga yetkazildi. Shifokorlar qizning jiddiy bo‘lmagan jarohat olganini ma’lum qildi.