Rossiyadagi football.kulichki.net sayti “Krasnodar” yarim himoyachisi Odil Ahmedovni Rossiya chempionati 4-turi ramziy terma jamoasiga kiritdi, deb xabar bermoqda Uff.uz.
“Odil Ahmedov — ‘Krasnodar’ning mavsum oldidan amalga oshirgan eng yaxshi transferlaridan biri. U raqib hujumini buzish bilan birgalikda o‘z jamoasi hujumini tashkil qilishda ham birdek o‘ynay oladigan universal futbolchi.
‘Rostov’ga qarshi kechgan o‘yinda yarim himoyachi o‘z jarima maydonchasidan raqib jarima maydonchasiga qadar bo‘lgan hududni egalladi va jamoadoshlariga hujum uyushtirishda katta yordam berdi. Mana shu faolligi evaziga o‘zi ham gol kiritdi.
Odil Ahmedov to‘pni qabul qilib olgach, sovuqqonlik bilan burchakka pastlatib zarba berdi va ‘Krasnodar’ni o‘yin oxiridagi asabbuzarlikdan qutqarib qoldi.
O‘zbekistonlik legioner himoyada ham yaxshi o‘ynadi. Shu bois Pavel Mamayev tuzalib safga qaytgach, asosiy tarkibdan joy olish uchun ancha ter to‘kishiga to‘g‘ri keladi. Umuman olganda, ikki frontda kurash olib boradigan ‘Krasnodar’ga rotatsiyalar kerak bo‘lishi aniq”, — deyiladi football.kulichki.net saytida keltirilgan maqolada.
Izoh (0)