Toshkent shahridagi “Fleshka” savdo majmuasida yangi Nokia Lumia 930 smartfonining sotuvi boshlandi. Bu haqda Mobinfo.uz sayti ma’lumotiga asoslanib “Parol” nashri xabar berdi.
Smartfonda 5 dyuymli ClearBlack AMOLED displeyi, 2,2 GGs chastotaga ega to‘rt yadroli Qualcomm Snapdragon 800 protsessori, 2 Gb tezkor va kengaytirib bo‘lmaydigan 32 Gb ichki xotira, 1,2 megapikselli old va 20 megapikselli orqa kamera, 2420 mA·soat quvvatga ega batareya o‘rnatilgan.
Metal korpusli Nokia Lumia 930 smartfoni Microsoft kompaniyasining Windows Phone 8.1 operatsion tizimida ishlaydigan ilk smartfoni hisoblanadi. Unda ovozli buyruqlarni bajaruvchi-yordamchi Cortana dasturi o‘rnatilgan. Microsoft bu dastur Apple’ning Siri dasturidan yaxshiroq ekanini ko‘rsatib reklama roligi taqdim etgan edi.
Toshkent shahridagi “Fleshka” savdo majmuasida Lumia 930 smartfoni 1 900 000 so‘mdan sotilmoqda. Ta’kidlash joiz, Lumia 930 hozirda kompaniyaning eng qimmat smartfoni hisoblanadi.
10-avgust holatiga ko‘ra O‘zbekistonda sotilayotgan eng qimmat smartfonlar o‘nligida Nokia Lumia 930 smartfoni iPhone 5s’dan keyin Galaxy S5 smartfoni bilan bir xil — ikkinchi o‘rinni band etmoqda.
Smartfonning Buyuk Britaniyada o‘tkazilgan taqdimotida uni sakkiz yuzta kartoshka va olma yordamida zaryadlashgani ancha qiziqarli hodisa bo‘lgan edi.
Izoh (0)