Ҳиндистон бош вазири Нарендра Модининг Twitter аккаунти хакерлар ҳужумига учради. Бу ҳақда унинг идораси ижтимоий тармоқда хабар берди, деб ёзади «РБК».
Идора маълумотларига кўра, хакерлар аккаунтни «жуда қисқа вақт давомида» назорат қилган. «Twitter огоҳлантирилди ва аккаунт дарҳол ҳимояга олинди», — дейилади хабарда.
Бош вазир идорасининг хабарида, шунингдек, аккаунт бузилган вақт давомида «нашр этилган твитларнинг ҳеч бирига эътибор бермаслик керак»лиги айтилган, бироқ воқеа айнан қачон содир бўлгани ва қачон аккаунт қайтариб олинганига аниқлик киритилмаган.
Twitter ҳужум ҳақида маълумот олиши биланоқ аккаунт устидан назоратни тиклаш учун барча зарур чоралар кўрилганини маълум қилди, деб хабар бермоқда Reuters. Текширувларда бошқа аккаунтлар ҳам бузилгани ҳақида ҳеч қандай белги аниқланмаган.
Bloomberg’нинг ёзишича, Модининг аккаунти бузилган вақтда Ҳиндистон расмий равишда биткоинга қонуний тўлов воситаси мақомини бергани ҳақида твит эълон қилинган. Шунингдек, мамлакат криптовалютани сотиб олгани, уни фуқароларга тарқатиши ҳақида айтилган.
Модининг Twitter аккаунти бундан бир йил олдин, 2020 йил сентябрь ойида ҳам хакерлар ҳужумига учраганди. Ўшанда аккаунтда уни Жон Уик фильмида шу номдаги қаҳрамонни ўйнаган Киану Ривз бузгани ҳақида ёзув пайдо бўлган. Шундан сўнг хакерлар Нарендра Модининг аккаунти орқали бош вазир томонидан COVID-19 билан курашиш учун ташкил этилган фондга криптовалюта хайрия қилишга чақирувчи бир нечта твитлар эълон қилган.
Аввалроқ хакерлар АҚШ Федерал қидирув бюросининг (ФҚБ) ташқи электрон почта тизимини бузиб кириб, камида 100 минг кишига электрон хат жўнатгани хабар қилинганди. ФҚБнинг маълум қилишича, ҳужумчилар чиндан ҳам ФҚБ манзилларидан сохта электрон почта хабарларини юборган, бироқ улар бюро маълумотларига киришга ёки уларни бузишга муваффақ бўлмаган.