Россиянинг Кировск вилоятида олдиндан тил бириктириб, катта миқдорда гиёҳвандлик воситаларини сотишга уринган ўзбекистонлик ака-укага суд ҳукми ўқилди. Бу ҳақда Кировск вилояти прокуратураси хабар берди.
Маълум қилинишича, 23 ёшли Ўзбекистон фуқароси 2020 йилда синтетик гиёҳвандлик воситаларининг улгуржи партиясини кейинчалик сотиш мақсадида интернет орқали сотиб олган. Ўзининг жиноий ишига 28 ёшли акасини ҳам жалб қилган. Улар тил бириктириб, Киров вилоятида гиёҳвандлик воситаларини ноқонуний сотиш билан шуғулланган.
Оғирлиги камида 40 грамм бўлган синтетик гиёҳвандлик воситаларининг навбатдаги партиясини сотиб олмоқчи бўлганида ҳуқуқ-тартибот органлари томонидан қўлга олинган.
Суд уларни Россия Жиноят кодексининг 228-модаси 4-қисмида (бир гуруҳ шахслар томонидан олдиндан тил бириктириб, катта миқдорда гиёҳвандлик воситаларини сотишга уриниш) назарда тутилган жиноятни содир этганликда айбдор деб топиб, ҳар бирига 6 йил муддатга озодликдан маҳрим этиш жазосини тайинлаган.
Хабарда айтилишича, улар жазони қаттиқ режимдаги колонияларда ўтайди.
Изоҳ (0)