Шимолий Македониянинг шимоли-ғарбидаги Тетово шаҳрида COVID-19 беморлари даволанаётган касалхонада ёнғин содир бўлди. Ҳодиса оқибатида камида 10 киши ҳалок бўлди. Бу ҳақда мамлакат соғлиқни сақлаш вазири Венко Филипчега таяниб, «Korrespondent.net» хабар берди.
«Айни пайтда ёнғин оқибатида 10 киши ҳалок бўлгани тасдиқланди, аммо бу рақам ошиши мумкин», — деб ёзади Соғлиқни сақлаш вазирлиги раҳбари Twitter’да. Вазир қурбонлар ва жароҳатланганларнинг оилаларига ҳамдардлик билдирди.
Филипченинг сўзларига кўра, ёнғин аллақачон бартараф этилган, барча тез ёрдам гуруҳлари жабрланганларга ёрдам бериш учун сафарбар қилинган.
Шу билан бирга, маҳаллий «Alsat-М» телеканали хабар беришича, 14 киши ёнғин қурбонига айланган, яна 20 га яқин бемор жароҳатланган. Оловни ўчиришга 7 та махсус техника ва 30 нафар ўт ўчирувчи жалб қилинган.
Ёнғин сабаблари ҳозирча номаълум.
Июль ойида Ироқнинг Насирия шаҳридаги COVID-19 беморларига мўлжалланган касалхонада ёнғин содир бўлганди. Ҳодиса қурбонларининг сони 77 кишига етган, 20 киши эвакуация натижасида қутқариб қолинган.
Шунингдек, 24 апрель куни Ироқнинг Бағдод шаҳрида жойлашган Ибн ал-Хатиб касалхонасида ёнғин содир бўлганди. Касалхонада ёнғиндан ҳимоя тизими бўлмаган. Дастлабки маълумотларга кўра, ёнғин бошланишига кислород баллонининг портлаши сабаб бўлган. Сўнгги маълумотлар бўйича 88 киши ҳалок бўлган, 100 дан ортиғи жароҳат олган. Қурбонларнинг камида 28 нафари сунъий нафас олдириш аппаратларига уланган беморлар бўлган.
Ўша ёнғиндан кейин Ироқда уч кунлик мотам эълон қилинганди. Ироқ соғлиқни сақлаш вазири ва Бағдод губернатори ишдан бўшатилган.