Наманган вилоят ИИБ Жиноят-қидирув бошқармаси (ЖҚБ)нинг икки нафар катта тезкор вакили жиноий жавобгарликка тортилди, деб хабар бермоқда «Xabar.uz».
Жиноят-қидирув бошқармасининг икки ходими Э.Х. ва К.Т. Жиноят кодексининг 234-моддаси (қонунга хилоф равишда ушлаб туриш ёки ҳибсга олиш) ва 206-моддаси (мансаб ваколати доирасидан четга чиқиш) моддаларида назарда тутилган жиноятларни содир этишда айбдор деб топилган.
Маълум қилинишича, улар 2020 йил 1 июнь куни Поп шаҳри марказидаги тамаддихонада енгил тушлик қилиш жараёнида ишлатган салфеткасини ерга ташлаган. Тамаддихона иш юритувчиси М.Ғ. бунга эътироз билдириб, танбеҳ берган.
Бунга жавобан ходим иш юритувчининг тиббий ниқоби йўқлигини айтиб, уни тасвирга олган. ЖҚБ ходимларининг ўзлари ҳам жамоат жойида ниқобсиз юргани сабабли иш юритувчи ҳам уларни қўл телефонига тасвирга олишга уринган, аммо ходимлар унинг қўл телефонини куч ишлатиш йўли билан тортиб олган.
Сўнг қўлини орқасига қайириб, бир-икки мушт тушириб, машинага ўтқазиб, туман ИИБга олиб келиб, калтаклаган. Ғурумсаройда содир бўлган қотилликни «бўйнига қўйвориш» билан ҳам таҳдид қилган.
Бир неча соатга чўзилган жисмоний ва руҳий босимлардан сўнг профилактика инспекторини чақириб, тамаддихона иш юритувчисига Маъмурий жавобгарлик тўғрисидаги кодекснинг 54-моддаси (эпидемияларга қарши кураш қоидаларини бузиш) билан иш очишни буюрган. Кейинроқ мазкур қўлбола «дело» туман прокурорининг протестига асосан бекор қилинган.
М.Ғ.нинг аризасига асосан туман прокуратураси ишга тушиб, суриштирувда ЖҚБ ходимларининг қилмиши тасдиқланган. Суд-тиббий экспертизасида жабрланувчида бош мия чайқалиши, бошининг пешона, бурун, ўнг билак, кафт бўғими соҳаларида қонталашлар, бошининг ўнг томон пешона тепа соҳасида жароҳатлар борлигини аниқланган.
Ҳолат юзасидан жиноят иши қўзғатилиб, ЖҚБ ходимлари етказилган моддий ва маънавий зарар учун М.Ғ.га 10 миллион сўм тўлаган.