Беларусь президенти Александр Лукашенко норозилик ҳаракатларини қўллаб-қувватлаган 80 нафар собиқ ҳарбий ва кучишлатар тизимнинг бошқа собиқ ходимларини лавозимлардан маҳрум қилди. Бу ҳақда Белта хабар берган.
Лукашенко имзолаган фармонда ижтимоий-сиёсий ҳолат кескинлашган вазиятда ноқонуний тадбирларни ташкиллаштирган ва уларда иштирок этган, интернет тармоғига экстремистик ахборотларни жойлаштирган кучишлатар тизимнинг собиқ ходимлари ҳарбий лавозимларидан маҳрум қилинган. Шунингдек, намойишлар вақтида уларнинг айримлари погонини юлиб отгани ва гувоҳномаларини улоқтиргани ҳам қайд этилган.
Собиқ ҳарбий ва бошқа ҳуқуқ-тартибот идораларининг собиқ ходимларининг айримларига нисбатан жиноий ишлар тергов қилинмоқда, хусусан, уларнинг баъзилари террорчилик ҳаракатларини содир этганликда айбланмоқда.
Беларусда 2020 йил август ойида бўлиб ўтган президентлик сайловларидан кейин Лукашенко расмий маълумотлар бўйича ғолиб деб топилган, ушбу ҳолатдан кейин бир неча ой давомида минглаб одамлар сайлов натижаларига қарши намойишлар ўтказган. Кучишлатар тузилмалар норозилик намойишларини аёвсиз бостирган, намойишчиларни кўчанинг ўзида калтаклаб, қамоқхоналарда тергов ҳибсхоналарида қийноққа солганди.
Беларусь мухолифат ОАВда кучишлатар тизимнинг собиқ вакиллари ва айни вақтда ҳарбий тузилмаларда ишлаётган кишилар томонидан намойишчиларга нисбатан зўравонликни камайтириш, вазиятни тинчлик йўли билан ҳал этиш лозимлиги таъкидланган видео ва фотосуратлар тарқатилган. Мурожаатларда ҳарбийларнинг кўпчилиги зўравонликка қарши ҳаракат сифатида погонларини юлиб отган.
Аввал апрель ойида Россия ФХБ ва Беларусь ДХҚ Лукашенкога суиқасд уюштиришга тайёргарлик кўрилганини билдиргани, Лукашенко мазкур фитнага АҚШнинг алоқаси борлигини айтган, Вашингтон эса Лукашенкога нисбатан суиқасдга алоқаси борлигини рад этганди. Шунингдек, апрель бошида Беларусь давлат хавфсизлик қўмитаси Тихановскаяни террорчиларга алоқадор одамлар рўйхатига киритган.