Билл ва Мелинда Гейтс 27 йиллик турмушдан сўнг кутилмаганда ажрашишга қарор қилди. Қизиқ, дастлаб улар ўртасидаги муносабат қай тарзда ривожланган?
Бўлажак жуфтликнинг йўли 1987 йилда Microsoft компаниясидаги брифингда кесишган. Ўша вақтда Мелинда Microsoft компаниясидан иш топиб, муваффақиятга эришган эди. Билл эса айнан шу компанияни 10 йилдан ортиқ бошқариб, 31 ёшида у тарихдаги энг ёш миллиардерга айланган. Кейинчалик унинг рекордини Facebook асосчиси Марк Цукерберг янгилади, у бу муваффақиятга 25 йил ичидан эришди.
Кейинги сафар улар автотураргоҳда кўришди. Билл Мелинда билан такрор учрашишга қарор қилган, аммо бу яна икки ҳафтадан сўнггина амалга ошиши мумкин эди. Ёш олим жуда кўп вақтини ишга сарф этар, ҳаттоки 16 соатлаб ишлар эди. Шунинг учун ҳам жадвалини бир неча ҳафта олдин режалаштирарди. Натижада Билл ўша куниёқ Мелинда билан учрашишни илтимос қилишдан бошқа чораси қолмади.
Жуфтликнинг сўзларига кўра, уларнинг муносабати шу тарзда ривожланиб борган. Мелинда романтикага берилиш борасида анчагина эҳтиёткор эди. Чунки бунга унинг ҳаётидаги аввалги муносабатлар тўсқинлик қилган. Унинг собиқ севгилиси жуда ҳам шафқатсиз бўлиб чиққан. Аммо Билл бутунлай бошқача бўлиб, унга кўпинча ҳазил қилган.
Биллнинг сўзларига кўра, Мелинда ўзининг мустақиллиги билан ҳам уни ром этган. «У эса жумбоққа бой ўйинларига бўлган муҳаббати билан эътиборимни тортган, – деб эслайди Мелинда. – Биринчи учрашувдаёқ биз математик масалани ким тезроқ ечиши ҳақида беллашганмиз. Мен ғолиб бўлдим ва бу иккимизни ҳам хурсанд қилди. Мен ғалаба қозонганимдан бўлса, Билл ўзи учун рақиб борлигидан қувонган эди. Биз рақобатлашишни яхши кўрамиз. Бу бизнинг энг севимли машғулотларимиздан бири».
Жуфтлик турмуш қуришга қарор қилишдан аввал бир неча йиллар мобайнида бир-бирини кузатган. Мелинда Биллни ҳаётда ҳам худди бизнесдагидек ҳукмрон бўлиши ҳақида ўйлар эди. Билл эса Мелинда билан учрашишдан аввал турмуш қуриш ҳақида умуман ўйламаган. У ҳаттоки «Мелинда билан никоҳ» рўйхатини тузиб, бунинг ижобий ва салбий томонларини ёзиб чиққан.
Орадан бироз вақт ўтиб, барча шубҳалар ортда қолган. 1994 йил 1 январь куни улар Гавайидаги Ланаи оролида турмуш қурган. Кераксиз шов-шув ва папараццилардан холи равишда Билл оролдаги меҳмонхонанинг барча хоналарини сотиб олган ва атрофида айланиб юрувчи вертолётларни учирган. 15 дақиқа давом этган тўй маросими Биллга 1 миллион долларга тушган.
Орадан икки йил ўтиб, оилада Женнифер исмли қизалоқ дунёга келди. 1999 йилда ўғли Рори ва 2002 йилда қизи Фиби туғилди. Фарзандлари туғилгач Мелинда компаниядаги ишини тарк этган ва ўзини оиласига бағишлаган. Аммо уй бекалигини ўзига мос деб билмаган: «Билл жуда кўп ишлар эди. Менга уй ишларида ёрдам бериш ўрнига ҳам китоб ўқир эди. Бу жуда зерикарли».
Мелинданинг сўзларига кўра, мажбурий туғруқ таътиллари қашшоқликнинг асосий сабабларидан биридир. «Ҳисоб-китобларимга кўра, аёл ўртача бир фарзандни тарбиялаш учун 7 йил вақт сарфлайди ва бу вақт давомида унга ҳеч қандай компенсация берилмайди. У шунча вақтнинг бир қисмини бирор ишга сарфласа, оила фаровонлиги сезиларли даражада ошади. Эр ва хотин тенг бўлгандагина, никоҳ мустаҳкам бўлади. Аёл жимгина уйдаги барча ишни зиммасига олмаслиги керак», – дейди Мелинда.
Мелинда ота-она масаласида ҳам шу каби қарашларга эга. Билл ўз бойлигининг катта қисмини хайрия ишларига сарфлашни режалаштирмоқда. Фарзандларга эса бошланғич капитал сифатида 10 миллион доллар берилади. «Биз тирик эканмиз, улар ўзларига ёқадиган ишни қилсин. Аммо уларни умрининг охиригача ишсиз, фақат мерос ҳисобига яшаш имкониятини бермаймиз», – дейди Биллнинг рафиқаси.
Ҳозирча ажримга нима сабаб бўлганини Билл ошкор қилмади. Ўзлари маълум қилганидек, жуфтлик узоқ вақт мобайнида салбий ва ижобий томонларни ўрганишга ва муносабатларни мустаҳкамлашга ҳаракат қилганини таъкидлаган. Мелинда ажримнинг сабаби сифатида Билл билан никоҳини қайта тиклаб бўлмас тарзда ифодалаган. 2019 йилги интервьюда Мелинда узоқ вақт мобайнида уларнинг турмушидаги асосий муаммолардан бири – Биллнинг оила ва иш ўртасидаги мувозанатни топа олмаслигидир, дея айтиб ўтган. «Мен турмушимдаги жуда оғир кунларни эслайман, у билан биргаликда табассум қила оламанми, дея савол берар эдим», – дейди Мелинда.
Эндиликда эр ва хотин мулкни тақсимлаш тўғрисида келишиб олиши керак. Forbes маълумотларига кўра, Биллнинг бойлиги 130 миллиард долларга баҳоланган ва у сайёрадаги энг бой инсонлар ичида тўртинчи ўринни эгаллаб турибди. Шунингдек, у Сиэтл яқинидаги кўл бўйида 125 миллион долларлик қасрда яшайди. Бундан ташқари, эр-хотин Калифорния штатидаги Дел-Марда 43 миллион долларлик мулкка, Флорида штатидаги 59 миллион долларлик ранчо ва Ваёмингдаги уйга эгалик қилади. Билл Леонардо да Винчининг 30 миллион долларлик суратини ўзи ичига олган бадиий тўплам ва шахсий самолётни ҳам рафиқаси билан бўлишиши керак.
Мавзуга доир: