Ethereum криптовалютаси асосчиси Виталий Бутериннинг бойлиги бир миллиард доллардан ошди, деб ёзмоқда Forbes.
4 май куни битта Ethereum криптовалютасининг нархи биринчи марта 3000 доллардан ошди, натижада Бутериннинг бойлиги 333 520 та криптовалюта билан 1,09 миллиард долларгача кўпайди. 2020 йил бошидан буён ушбу криптовалюта деярли 25 баробарга ўсди.
Forbes журнали 27 ёшли Бутеринни криптовалюта орқали бойлик орттирган дунёнинг энг ёш миллиардери сифатида қайд этди.
Бутерин 1994 йил Москва вилоятининг Коломна шаҳрида туғилган, лекин у олти ёшга кирганда унинг оиласи Канадага кўчиб ўтган ва у ўша ерда вояга етган.
Ethereum биткоиндан кейин дунёдаги иккинчи энг йирик криптовалюта ҳисобланади. Ҳозир унинг бозор капитализацияси 389 миллиард долларга баҳоланмоқда.
Маълумот учун, 22 йил давомида дунёнинг энг нуфузли инсонлари рўйхатини тузиб келаётган Time журнали биринчи марта энг нуфузли компаниялар рўйхатини ҳам тузди, ундан Coinbase криптовалюта биржаси ҳам ўрин олди.
Аввалроқ биткоиннинг аноним асосчиси дунёнинг энг бой одамларидан бирига айланди. Турли ҳисоб-китобларга кўра, 750 мингдан 1,1 миллионгача криптовалюта тангаларига эгалик қилувчи, Сатоси Накамото тахаллуси билан танилган биткоин асосчисининг бойлиги 61 миллиард долларга етди.