Ўзбекистон, Тожикистон, Венесуэла, Германия, Сурия ва Шри-Ланкадан бўлган талабалар, аспирантлар ва ординаторларга таълимни давом эттириш учун Россияга киришга рухсат берилди. Россия Илм-фан ва олий таълим вазирлигининг маълум қилишича, 31 март куни мамлакат ҳукуматининг тегишли қарори чиқарилган.
Чет эллик талабалар Россияга келишидан олдин электрон почта орқали университетни чегарани кесиб ўтадиган сана ҳақида камида 10 кун олдин хабардор қилиши керак. Хат юборилганидан сўнг электрон почтага кириш тўғрисида маълумот келади.
Талабалар Россияга келишдан 3 кун аввал талаба ПЗР усулида COVID-19 тестини топшириши керак. Агар натижа салбий чиқса, бу ҳақда ўз мамлакатида рус ёки инглиз тилидаги тегишли ҳужжат олиши лозим.
Россияга кириб келгандан сўнг, талаба 72 соат давомида шу усулда қайта тест топширади. Тест натижалари чиққунча у яшаш жойида ўзини яккалаш тартибига амал қилиш зарур. Бу даврда дарслар онлайн шаклда ўтказилади. Такрорий тест топширмаган хорижий талабаларнинг анъанавий ўқишга қайтишига рухсат берилмайди.
Агар изоляция пайтида Россияга келган чет эллик талабаларда ўткир респиратор касалликнинг биринчи аломатлари кузатилса (иситма, томоқ оғриғи, бурун оқиши, йўтал), талаба бу ҳақда зудлик билан университетга хабар бериши ва шифокор чақириши лозим.
Чет эллик талабалар, аспирантлар ва ординаторларга Россияга келишдан олдин ва ундан кейинги биринчи ҳафталарда нима қилиш кераклиги тўғрисида босқичма-босқич кўрсатмалар уларга электрон почта орқали юборилади, университет веб-сайтлари ва ижтимоий тармоқларда жойлаштирилади.
Эслатиб ўтамиз, Россияда ОТМларида ўқийдиган хорижий талаблар 2020 йилнинг 13 ноябридан буён талабалар масофавий тарзда ўқиётганди. Мамлакат олий ўқув юртларида 8 февралдан бошлаб анъанавий ўқиш жараёни тикланди. 16 февраль куни «Роспотребнадзор» авиақатнов тикланган мамлакатлардан келаётган хорижлик талабалар учун айрим талаблар эвазига ўқишига рухсат берганди. Бироқ ўзбекистонлик талабаларга мамлакатга киришда ўрнатилган чекловлар бекор қилинмади.
2021 йилнинг 20 мартида 25 та мамлакатдан келадиган талабаларнинг Россияга киришига рухсат берилди, бироқ улар орасида Ўзбекистон ўрин олмади. Ўзбекистоннинг Россиядаги элчихонаси матбуот хизмати талабалари Россияга киришга рухсат этилувчи давлатларнинг рўйхати «Роспотребнадзор» томонидан мунтазам равишда янгиланиб туришини маълум қилганди.