Тошкент шаҳар транспорт бошқармаси пойтахтда bike sharing тизимини ривожлантириш бўйича дастлабки жиддий лойиҳани тақдим этди.
Bike sharing — бу қисқа муддатли йўл учун бепул ёки арзон нархда ижарага велосипед тақдим этиладиган тизим.
«Podrobno.uz»нинг ёзишича, дастлаб лойиҳа Юнусобод туманидан бошланади ва 4 пунктни ўз ичига олади. Уч ойлик синов натижаларига кўра ушбу тажрибани пойтахтнинг бошқа туманларида ҳам жорий этиш режалаштирилган.
Европанинг бир қатор мамлакатларида bike sharing жамоат транспорти муқобили сифатида фойдаланилади.
Статистикага кўра, бугунги кунда Тошкентда 40 мингдан ортиқ киши велосипеддан фойдаланади.
Тошкентда умумий ҳисобда 606 километр узунликдаги велосипед йўлакларини яратиш режалаштирилмоқда. Ҳозирда 12,4 километр узунликдаги велосипед йўлакчалари аҳоли фойдаланиши учун топширилган.
Тошкентда велосипедларни ижарага бериш тартибининг дастлабки таклиф лойиҳаси юзасидан фикрларни қуйидаги ҳаволада қолдириш мумкин.
Аввалроқ Тошкент шаҳридаги Фарғона йўли кўчасини реконструкция қилиш доирасида эски трамвай линияси ўрнида тезюрар автобуслар (bus rapid transit) қатновини жорий этиш режалаштирилган, тажриба сифатида Истиқлол ва Фарғона йўли кўчаси бўйлаб Амир Темур хиёбонидан Compass савдо-кўнгилочар марказига қадар йўналиш белгиланганди.
Шунингдек, пойтахтда тез ёрдам, ўт ўчириш машиналари ва автобуслар учун алоҳида йўлаклар ташкил этилиши режалаштирилганди.
Изоҳ (0)