Олий судда жазони ижро этиш муассасаларида оғир, ўта оғир жиноятларни содир этиб, турли муддатларга озодликдан маҳрум этилган 16 нафар маҳкума аёлнинг кассация тартибида берган шикоятлари кўриб чиқилди. Бу ҳақда ЎзА хабар қилмоқда.
Таъкидланишича, Олий суд раисининг ўринбосари Икром Муслимов раислигида бўлиб ўтган очиқ суд мажлисларида ҳар бир аёлнинг кассация тартибида берган аризаси қонун доирасида батафсил ўрганилди.
Маҳкума аёллар жазонинг асосий қисмини ўтагани, қилмишидан чин кўнгилдан пушаймонлиги, жазони ўташ жараёнида ўзининг ижобий жиҳатларини намоён этиб, муассаса раҳбариятининг ташаккурномасини олгани эътиборга олинди.
Хусусан, судда иши кўрилган Ш.Сувонова аслида 2025 йил 9 сентябрда озодликка чиқиши керак эди. У Тожикистондан гиёҳвандлик моддасини контрабанда йўли орқали олиб келишга буюртма бериб, келтирилган 9,6 килограммдан зиёд «опий»ни хонадони ертўласига яшириб қўйган.
Ҳуқуқни муҳофаза қилувчи органлар ходимлари ўтказган тезкор тадбирда эса ушбу ҳолат фош этилган.
Жазони ижро этиш муассасасида бундай жиноят содир қилган шахсларга қилмишларининг оқибати тушунтирилиб, зарур тарбиявий ишлар олиб борилади. Хатосидан тўғри хулоса чиқарган шахсларгина муддатидан олдин озодликка чиқарилиши учун тавсиялар берилган.
Суд ажрими билан содир этган жинояти учун тайинланган жазонинг асосий қисмини ўтагани, қилмишига иқрор ва пушаймон бўлгани, ёши ҳамда кафолат хатлари инобатга олиниб, 14 нафар аёлнинг тайинланган жазолари енгиллаштирилиб, жазодан озод қилинди. Шунингдек, 2 нафар маҳкума аёлга тайинланган жазолар енгиллаштирилди.
«Шу ишларни қилиб, бу жиноятга аралашиб кетганимдан кейин оила аъзоларим мендан юз ўгиришди.
Уларнинг ҳеч бири жиноятчи эмас, барчаси ўқимишли эди. Шу ишни қилма, дейишганда қилмаяпман, деб давом этавердим. Натижада 8 та акам мендан юз ўгирди», – дейди маҳкума аёллардан бири.
Тадбирда Олий Мажлиснинг Инсон ҳуқуқлари бўйича вакили (омбудсман) Феруза Эшматова иштирок этиб, судда кўрилган ишлар бўйича ўз фикрини билдирди. Бундай тадбирлар инсонпарварлик намунаси эканини эътироф этди.
«Буларнинг орасида қайта жиноят содир этганлар ҳам бор. Улар ўз қилмишига пушаймон бўлгани учун ҳам жазодан озод этиляпти. Жиноят йўлига қайта кирмаслик учун муассасада ўрганган ҳунарлари бўйича ишлаб, ҳалол пул топишни ўзига асосий мақсад қилиб олишган», – дейди Феруза Эшматова.
Озодликка чиқарилган аёлларнинг келгуси ҳаёти, уларнинг ишга жойлашиши, жамиятда ўз ўрнини эгаллаши борасида кўмаклашиш учун Омбудсман бу жараёнларни мониторинг қилиб боради.
Маълумот учун, Шавкат Мирзиёев 2020 йил 8 март муносабати билан 83 нафар маҳкум аёлни афв этган эди.
Аввалроқ Зангиотадаги аёллар колониясидан бир гуруҳ маҳкумалар озодликка чиқарилгани ҳақида хабар берилганди.