АҚШнинг 24 та шаҳрида 15 февраль, душанба куни ҳаво ҳарорати рекорд даражада пасайди. Бу ҳақда АҚШ Миллий метеорология хизматига таяниб «Интерфакс» хабар берди.
«Сешанба куни бу жойларнинг аксариятида янада совуқ бўлиб, янги рекордлар қайд этилиши кутилмоқда», — дейди америкалик метеорологлар Twitter тармоғида.
Техас штатининг Корпус Кристи ва Хюстон шаҳарларида ҳарорат мос равишда 1895 ва 1905 йилдан буён биринчи марта Цельсий бўйича -8 даражадан пасайди. Миннесота штатининг Хиббинг шаҳрида 1939 йилдан буён биринчи марта ҳарорат -38 даражадан тушиб кетди. Небраска штатининг Норт Платт шаҳрида эса 1881 йилдан буён биринчи марта -33 даража совуқ кузатилди.
NBC телеканалининг хабар беришича, 26 та штатнинг 150 миллиондан ортиқ аҳолиси фавқулодда совуқ об-ҳаво ҳақида огоҳлантирилган. Бўрон сабабли электр энергияси узилмоқда, сешанба куни эса музли йўлларда тирбандликлар бўлиши кутилмоқда.
Техаснинг шарқи, Арканзас, Иллинойснинг баъзи ҳудудлари, Кентукки, Индиана ва Огайо штатларида қор ёғди. Оклахомада ёғган қор қалинлиги 15 сантиметрга етди.
14 февраль, якшанба куни кечқурун АҚШ президенти Жо Байден 11 февралдан бери ёғаётган қор сабабли Техас штатида фавқулодда ҳолат эълон қилди. Штатда миллиондан ортиқ аҳоли совуқ ҳаво ва бўрон сабабли чироқсиз қолди.
Изоҳ (0)