Германия соғлиқни сақлаш вазири Йенс Шпан ҳукуматнинг 2022 йил учун коронавирусга қарши вакцинага буюртма берганини маълум қилди. Бу ҳақда «Интерфакс» хабар берди.
«Биз 2022 йил учун қўшимча вакцинага буюртма беряпмиз, шу йўл билан ҳеч бўлмаганда вируснинг бир қисмини назорат остида ушлашимиз мумкин бўлади», — деган вазир тиббиёт ходимлари билан ўтказилган онлайн суҳбатда.
Шпаннинг таъкидлашича, вакцина захираси керак бўлиш ёки бўлмаслигини олдиндан айтиш мушкул. Шунга қарамай, ишлаб чиқариш кўлами кенгайтирилиб, давлат эҳтиёт чораси сифатида қўшимча буюртмалар бермоқда.
Шунингдек, вазир вакцинация кампанияси бошланиши қийин кечган бўлса-да, асосий вакцина етказиб берувчилар — Moderna, Pfizer ва AstraZeneca 22 февралга қадар Германияга 5 миллион доза вакцина етказиб бериш масъулиятини олганини қайд этди.
Аввалроқ AstraZeneca Европа Иттифоқига 2021 йилнинг биринчи чорагида вакцина етказиб беришни 67 фоизга қисқартиришини, сабаби Буюк Британия билан ЕИдан аввалроқ шартнома тузганлигини маълум қилганди.
Frankfurter Allgemeine Zeitung нашрига берган интервьюсида Шпан Россия ва Хитой вакцинасидан фойдаланиш эҳтимоли ҳам йўқ эмаслигини таъкидлаган. Бунинг учун ягона талаб —Европа дори-дармон агентлиги (EМА) томонидан мазкур вакциналар маъқулланиши лозим.
Шу билан бирга, Dow Jones агентлигининг маълумотларига кўра, Европа вакцинация пойгасида Буюк Британия ва АҚШдан ортда қолмоқда. Оксфорд университети Буюк Британия ва АҚШ давлатлари аҳолисини мос равишда 11,3 фоиз ва 7,1 фоизга эмлаганини билдирган. Европа Иттифоқида эса 450 миллион аҳолининг атиги 2,2 фоизи COVID-19’га қарши эмланган.
Европа Иттифоқига аъзо давлатлар учун вакциналар марказлашган тарзда сотиб олинади. Евроиттифоқ олтита ишлаб чиқарувчига аҳолиси кўп мамлакатларнинг 70 фоизини эмлаш учун 2,3 миллиард доза вакцина буюртма қилган.