Сиёсатчи Алексей Навальний Россияга қайтишини маълум қилди. Meduza’нинг хабар беришича, у Москвага «Победа» рейси билан 17 январь куни учиб келади.
«Қайтиш ёки қайтмаслик деган савол менинг олдимда ҳеч қачон турмаган. Чунки мен кетмаганман. Германияга реанимация қутисида келиб қолдим, битта сабаб билан: мени ўлдирмоқчи бўлишди», — деган Навальний.
Сиёсатчининг таъкидлашича, унга қарши янги жиноят иши очаётган «Путиннинг хизматкорлари» ҳаракати «унчалик қизиқ эмас».
Мавзуга доир: «У кимга керак ўзи? Агар хоҳлаганимизда ишни охирига етказган бўлардик». Путин Навальнийнинг заҳарлангани ҳақида
29 декабрь куни Тергов қўмитаси катта миқдордаги фирибгарлик учун Навальнийга қарши жиноий иш қўзғатди. Тергов версиясига кўра, Навальний, ККФ (Коррупцияга қарши кураш фонди) ва бошқа нотижорат фондларнинг «ҳақиқий раҳбари сифатида», «бошқа шахслар билан ҳамкорликда» хайрия сифатида йиғилган ва фақат фонд мақсадлари учун мўлжалланган 588 миллион рублнинг 356 миллионини шахсий мақсадлари йўлида сарфлаган.
12 январь куни Жазоларни ижро этиш федерал хизмати «Ив Роше» иши бўйича Навальнийга шартли муддатни ҳақиқийсига алмаштиришни сўраб судга мурожаат қилди. Идора ўз ҳаркатини Германияда бўлиб турган Навальний шартли ҳукм мажбуриятларини бажармаётгани ва жиноий-ижро инспекцияси назоратидан бўйин товлаётгани билан изоҳлаган.
Изоҳ (0)