Президент Шавкат Мирзиёев «Тошкент шаҳрида маиший ва қурилиш чиқиндилари билан боғлиқ ишларни амалга оширишни такомиллаштириш чора-тадбирлари тўғрисида»ги қарорни имзолади. Бу ҳақда Telegram’даги «Ҳуқуқий ахборот» канали хабар берди.
Қарорга кўра, Давлат экология қўмитаси тизимидаги «Махсустранс» давлат унитар корхонаси ва «Чиқиндиларни қайта юклаш ва утилизация қилиш» давлат корхонаси Тошкент шаҳар ҳокимлиги тизимига ўтказилади.
«Махсустранс» давлат унитар корхонаси иштирокида чиқиндилар билан боғлиқ ишлар давлат-хусусий шериклик асосида ташкил этилади. Тошкент шаҳридаги чиқиндиларни бошқариш соҳасининг мақсадларига қуйидагилар киради:
- қаттиқ маиший чиқиндиларни қайта ишлаш даражасини ҳозирги 8 фоиздан 30 фоизга қадар кўтариш;
- қаттиқ маиший чиқиндиларни йиғиш ва олиб чиқиб кетиш хизматларини ташкиллаштириш соҳасида хусусий сектор улушини 100 фоизга қадар ошириш;
- аҳолига кўрсатилган қаттиқ маиший чиқиндиларни тўплаш ва олиб чиқиб кетиш хизматидаги дебитор қарздорликни 75 фоизга камайтириш.
- 1-босқичда (2021 йилда) — Тошкент шаҳар ҳокимлиги томонидан белгиланадиган маҳалла фуқаролар йиғинлари ҳудудида чиқиндиларни «қайта ишланадиган» ва «қайта ишланмайдиган» тоифаларга ажратган ҳолда йиғиш;
- 2-босқичда (2022 йилда) — «Махсустранс» давлат унитар корхонаси томонидан хизмат кўрсатиладиган барча ҳудудлардаги якка тартибдаги турар-жой секторида қаттиқ маиший чиқиндиларни «қайта ишланадиган» ва «қайта ишланмайдиган» тоифаларга ажратган ҳолда йиғиш;
- 3-босқичда (2023 йилдан бошлаб) — барча туманларда чиқиндиларни «қайта ишланадиган», «қайта ишланмайдиган», «органик», «хавфли маиший чиқиндилар» ва бошқа тоифаларга ажратган ҳолда йиғиш.
Чиқиндиларни олиб чиқиб кетиш тарифлари истеъмолчилар томонидан чиқиндилар саралаб йиғилганлигини инобатга олиб пасайтирилган ҳолда белгиланади.
Аввалроқ Тошкентда маиший чиқинди ва электр энергияси тарифлари бирлаштириб юборилиши мумкинлиги тўғрисида хабар берилганди.
Изоҳ (0)