Эронда хорижий разведка хизматлари билан ҳамкорлик қилганликда айбланиб судланган мухолифат журналисти Руҳоллаҳ Зам қатл этилди, дея хабар қилмоқда Meduza.
Зам Олий суд унинг жазосини енгиллаштириш ва ишни қайта кўриб чиқишни рад этгандан тўрт кун ўтиб 12 декабрь куни эрталаб осиб ўлдирилган.
Зам Эроннинг энг таниқли мухолифат фаолларидан бири ва мамлакатдаги юқори лавозимли амалдорларга қарши айблов далилларини нашр этган Amad News Telegram каналининг асосчиси эди. Канал Эронда 2017 йилда бўлиб ўтган норозилик намойишларини фаол равишда ёритиб борган.
Эрон суди Замни ҳукуматга қарши фаолият ҳамда АҚШ, Франция ва Исроил разведка хизматлари билан ҳамкорликда айбдор деб топди. Эрон расмийларига кўра, журналист ўз постларида ўқувчиларни тартибсизликларда қатнашишга чақирган.
Зам бир неча йил Францияда яшаб, у ерда сиёсий бошпана олган. 2019 йилда у Ислом инқилоби соқчилари корпуси томонидан ўғирлаб Эронга олиб кетилган. Тахминларга кўра, уни Ироқда ўғирлашган. Маълум қилинишича, Замни маҳаллий фаоллардан бири Ироққа эксклюзив интервью олиш таклифи билан алдаб чақирган.
Аввалроқ Эрон ҳукумати ядрошунос олимнинг ўлдирилишига алоқадор шахслар қўлга олинганини маълум қилгани, Эронда «Ал-Қоида» етакчиларидан бири йўқ қилингани ҳамда туркиялик инсон ҳуқуқлари фаоли Эбру Тимтик 238 кунлик очлик эълонидан сўнг вафот этгани ҳақида хабар берилганди.