Машҳур кўча рассоми Бэнкси 10 декабрь куни Instagram’да ўзининг янги асарини жойлади, деб хабар бермоқда Meduza.
Унда рўмолдаги кекса аёлнинг қаттиқ аксирганидан қўлидаги сумка ва ҳассаси тушиб кетгани, оғзидан эса сунъий жағ тишлари отилиб кетгани акс этган. Янги асар «А-а-апчҳи» деб номланади.
Бэнксининг янги асари кўчанинг бошидаги қияликда жойлашган уйда бўлиб, Instagram’да жойланган сурат шундай олинганки, худди кекса аёлнинг акса уришидан қўшни уйлар ён томонга оғиб, уйнинг ёнидаги соябонли ўткинчи ерга йиқилаётгандек тасаввур уйғотади. Расм Instagram’га жойланганидан бир сутка ўтмай у 2 миллионта лайк тўплаган.
Граффити Бристол шаҳрида пайдо бўлган. Шаҳардаги Вейл-стрит Англиядаги тик турар жой кўчаси ҳисобланади. Унинг қиялиги 22 даражани ташкил этади.
Вейл-стриртда яшовчи Дейл Комлининг BBC’га айтишича, 10 декабрь куни эрта тонгда у деразага қараган ва кўчада нур қайтарувчи куртка кийган «бақувват йигит»нинг кўча бурчагидаги уйнинг деворига тикилиб турганини кўрган. Комли уни ишчилардан бири деб ўйлаган. Аммо орадан бир соат ўтиб кўчада бир тўда одамларнинг граффити томоша қилаётганини кўрган.
Айни пайтда Бэнксининг асари сақланиб қолиши учун шаффоф пластик экран билан қопланган. Рассомнинг Instagram’идаги обуначиларининг фикрича, граффити чизилган уй эгаси миллионерга айланади. Бэнксининг асарлари бўйича мутахассис бўлган арт-дилер Жоуи Сайер «А-а-апчҳи»ни 3-5 миллион фунт стерлинг (4-6,5 миллион доллар)га баҳолаган.
Яқинда граффити чизилган уй сотувга қўйилди. Бунгача Вейл-Стритдаги кўчмас мулклар нархи 400 минг фунт (530 минг доллар)дан ошмаган.
Бу Бэнксининг Бристол кўчаларидаги саккизинчи граффитиси. Маҳаллий BristolLive газетаси Бэнксининг янги асарида акс этган соябонли киши қидирилаётганини эълон қилган.
Журналистларнинг фикрича, Бэнксининг янги граффитиси, аввалгилари каби коронавирус пандемиясига бағишланган. Ушбу асар британияликлар COVID-19’га қарши вакцина олишни бошлаганидан 2 кун ўтиб пайдо бўлган ва афтидан, жамоавий иммунитет шаклланишига бир қадам ташланганига қарамай, вирус тарқалишининг олдини олиш учун одамлар ниқоб тақишда давом этиши кераклигига ишора қилади.
Эслатиб ўтамиз, Бэнкси номаълум кўча рассомининг тахаллуси бўлиб, у турли шаҳарларнинг кўчаларида чизган суратлари билан танилган. Рассом ўзини оммага маълум қилмаган ва унинг шахси сирлилигича қолмоқда.
Мавзуга доир:
- Бэнксининг картинаси ўн дақиқадан камроқ вақт ичида қарийб 10 млн долларга сотилди
- Кўча рассоми Бэнксининг янги асари Ноттингемда пайдо бўлди
- Машҳур кўча рассоми Бэнкси судда ўзини ошкор қилмагани учун энг таниқли асарларидан бирининг муаллифлик ҳуқуқидан маҳрум бўлди
- Италияда Бэнксининг ўғирлаб кетилган асари топилди
- Бэнкси янги картинасида шифокорларни суперқаҳрамонларга тенглаштирди.
- Бэнксининг Британия парламенти мазах қилинган картинаси 12 млн долларга сотилди. Бу кўча мусаввири асарлари учун янги рекорд
- «Уйдан ишлашимни хотиним ёмон кўради». Бэнкси ўзининг карантинга бағишланган янги ишларини кўрсатди (фото)