Тошкентда жамоат транспорти йўловчиларига тарқатилаётган бепул қўлқоп харажатлари давлат томонидан қопланади

Турли юқумли мавсумий инфекциялар тарқалишининг олдини олиш ва йўловчилар саломатлигини асраш мақсадида 19 октябрдан бошлаб Тошкент шаҳар жамоат транспорти (автобус, метро, йўналишли такси) хизматидан фойдаланганда йўловчиларнинг тиббий ниқоб ва қўлқопда бўлиш тартиби жорий этилиши, улар йўловчиларга бепул тақдим этилиши хабар берилганди.

Тошкент шаҳар транспорт бошқармаси бошлиғи Анвар Жўраев жамоат транспортида йўловчиларга тарқатиладиган тиббий қўлқоплар кимнинг ҳисобидан харид қилинишига аниқлик киритди.

«Қўлқоплар йўловчилар ҳисобидан эмас, транспорт корхоналари томонидан сотиб олинмоқда. Ҳар бир қўлқоп 56 сўмга айланмоқда. Йўлкира 1400 сўм бўлса, қўлқоп бу сумманинг бор-йўғи 4 фоизини ташкил этмоқда. Буни метрополитен ҳамда ‘Тошшаҳартрансхизмат’ корхоналарининг молиявий хўжалик иши ой якуни бўйича у ерга кетган харажатлар давлат томонидан қоплаб берилади», — деган Анвар Жўраев АОКАда «Жамоат транспортида тиббий қўлқоп кийиш тартибининг жорий қилиниши» мавзуси бўйича ўтказилган брифингда.

Шунингдек, жамоат транспортида тиббий қўлқоп тақишнинг мажбурий қилинишига нима сабаб бўлганига ҳам тўхталиб ўтган.

Унинг айтишича, бугунги кунда Тошкент шаҳрида 129 та йўналишда мингдан ортиқ автобус йўналишга чиқяпти. Автобусларда ташилаётган йўловчилар сони 300 мингта, метрополитенда 130 мингтани ташкил қилади.

«Йўловчилар коронавирусни юқтириб олиш хавфи юқори эканини инобатга олиб, Россия ва АҚШ тажрибаларини ўрганиб, йўловчиларга бир марталик қўлқопларни тарқатиб, 19 октябрдан автобус ва метрода қўлқопдан фойдаланиш талаби киритилди.

Бунинг энг асосий сабаби – ҳар бир йўловчи бир кунда ўртача 20-30 дақиқани транспортда ўтказади. Шу даврда йўловчиларимизга чиптачилар, ҳайдовчилар ҳамда метродаги касса ва метро операторлари томонидан бепул бир марталик қўлқоплар тарқатилмоқда. Метро, автобус тутқичлари қўлқоплардан фойдаланган ҳолда ушланса, касалликни юқтириб олиш хавфи камаяди», — деган Тошкент шаҳар Транспорт бошқармаси вакили.

У метрополитеннинг ҳар бир вестибюли, бекатида кузатув ўтказилганини, унга кўра, антисептик қуйиш мосламаси ўрнатилган бўлишига қарамай, ундан фойдаланганлар кўрсаткичи, 5-10 фоизни ташкил қилганини таъкидлаган.