Туркиянинг барча провинцияларида ниқоб тақиш мажбурий этиб белгиланди. Коронавирус пандемияси шароитида жамоат жойларида ниқоб тақиш режимига амал қилмаганлар маъмурий жавобгарликка тортилади. Бу ҳақда «Интерфакс» хабар берди.
Қайд этилишича, Туркия фуқаролари ва меҳмонлари жамоат жойларида мажбурий тартибда ниқоб тақиши керак. Ниқобни фақат уйда ечиш мумкин. Тегишли қарор мамлакатда ижтимоий масофа қоидаларига амал қилинмаётгани ва касалланиш ҳолатлари сони ортгани сабабли ҳукумат йиғилишида қабул қилинган.
Фуқаролар кўчаларда, хиёбонларда, боғларда, пикник учун ажратилган жойларда, пляжларда, жамоат транспортида ва иш жойида ниқоб тақиши керак. Шунингдек. йўловчилар ўртасида ижтимоий масофани таъминлаш мақсадида жамоат транспортида тик ҳолатда ҳаракатланиш ҳам тақиқланган.
Бундан ташқари, ярим тундан кейин ресторан ва кафеларда концерт ўтказиш тақиқланган. Пляжларда, бозорларда ва умумий овқатланиш шохобчаларида ижтимоий масофани сақлаш устидан ҳуқуқни муҳофаза қилувчи органлар назорат олиб боради.
Провинциялар губернаторлари коронавирусга қарши кураш доирасида қабул қилинган чораларга амал қилмаган юридик ва жисмоний шахслардан жарималар ундириш билан шуғулланади.
Бундан ташқари, COVID-19 пандемияси Туркияда иккинчи энг юқори чўққисига чиққан. Май ва июнь ойларидан буён касалланиш ва ўлим бўйича энг юқори кўрсаткичлар сўнгги бир неча кун ичида қайд этилган.