Россия пойтахти Москва шаҳрида дастлабки кўнгиллилар COVID-19 касаллигига қарши вакцинани қабул қилди. Бу ҳақда «Интерфакс» хабар берди.
«Бугун Москвада рўйхатдан ўтказишдан кейинги тадқиқотлар доирасида шаҳар аҳолисини коронавирус инфекциясига қарши эмлаш бошланди. Илк иштирокчилар пойтахтдаги муассасаларда эмланди», — дея маълум қилган Москва мэрининг ижтимоий ривожланиш бўйича ўринбосари Анастасия Ракова.
Вакцинани қабул қилиш учун аллақачон 35 минг киши рўйхатдан ўтган. Унинг сўзларига кўра, вакцина қабул қилишни хоҳловчилар сони ҳар куни кўпаймоқда. «Айтиш мумкинки, биз ажиотажни кўряпмиз. 35 мингдан ортиқ москвалик ариза берган. Ҳозир пойтахтда коронавирусга қарши вакцина синови олтита муассасада ўтказилмоқда. Кейинроқ уларнинг сони 20 тага етади», — дея маълум қилган мэр ўринбосари.
Анастасия Ракова кўнгиллиларни эмлашнинг биринчи босқичи аҳамиятини таъкидлаб ўтган. «Бугун нафақат шаҳар, балки бутун мамлакат учун муҳим кун. Бу бизни вакцинани ҳар бир киши олиши мумкин бўлган вақтга яқинлаштиради», — деди Ракова.
Эмлаш икки босқичда ўтказилади. Биринчи босқичда кўнгиллиларга вакцинанинг бир қисми юборилади, 21 кундан кейин эса иккинчи қисми берилади. Вакцина қисмлари уларнинг таркибига кирадиган моддалари билан фарқ қилади — бу организмнинг иммунитет ҳимоясини ошириш учун қилинган.
Москва ҳукумати ва Россия Соғлиқни сақлаш вазирлиги ҳузуридаги Гамалея номидаги миллий тадқиқот маркази шаҳар аҳолисини коронавирусга қарши вакцинанинг рўйхатдан ўтказишдан кейинги клиник синовларида иштирок этишга таклиф қилмоқда. Синовларда 40 минг кишининг иштирок этиши режалаштирилган, эмлаш бепул ўтказилади.
Эслатиб ўтамиз, Россиянинг Гамалея институти томонидан яратилган ва «Спутник V» деб ном олган коронавирусга қарши икки компонентли вакцина 11 август куни вақтинчалик рўйхатдан ўтиш гувоҳномасини олди. Вакцина тўлиқ самарадорлик тадқиқотини ўтказиш шарти билан рўйхатдан ўтказилган ва гувоҳнома 2021 йил 1 январга қадар амал қилади.
Ушбу вакцина синовининг 3-босқичини 2022 йил охирларига бориб якунланиши маълум қилинган. 3-босқичида иштирок этадиган ўн минглаб кўнгиллилар барча зарур муолажаларни амбулатория шароитида ўтайди.