Boeing компанияси 787 Dreamliner самолётларини ишлаб чиқаришдаги нуқсонларни аниқлади, деб хабар беради CNN.
Нуқсон лайнернинг горизонтал дум барқарорлаштиргичида аниқланган. Шу сабабли ҳозирда эксплуатацияда бўлган саккизта авиалайнер парвози тўхтатиб қўйилган. Бундан ташқари, аниқланган нуқсон авиакомпаниянинг янги самолётларни етказиб бериш жараёнларини секинлаштиради.
The Wall Street Journal’нинг ёзишича, бу сўнгги ойларда Dreamliner’ларда аниқланган учинчи нуқсон ҳисобланади.
Нашр маълумотларига кўра, ҳозирда АҚШ Федерал фуқаролик авиацияси бошқармаси ўрганаётган олдинги нуқсонларнинг хавф даражаси сабаб ишлаб чиқариш бошланганидан буён бозорга етказиб берилган мингта Dreamliner’дан 900 таси текширувдан ўтиши мумкин.
Эслатиб ўтамиз, 2018 йилда «Ўзбекистон ҳаво йўллари» (Uzbekistan Airways) Вашингтонда АҚШнинг Boeing компанияси ўртасида битим имзоланган. Унга кўра 2019 йилда иккита, 2020 йилда яна битта Dreamliner Ўзбекистонга олиб келиниш белгиланган. Хусусан, 2019 йилнинг июлида Ислом Каримов номидаги Тошкент халқаро аэропортига янги Boeing 787-8 Dreamliner’и келиб қўнган — бу ҳисоб бўйича бешинчи Dreamliner ҳисобланади.
2018 йил май ойида Президент Шавкат Мирзиёев Вашингтондан қайтиб, Тошкент халқаро аэропортида янги Boeing-787 самолётини кўздан кечирган эди. Декабрь ойида эса интернетда Ўзбекистон томонидан харид қилинган янги Dreamliner’нинг бузилгани ҳақида хабарлар тарқалган, Uzbekistan Airways эса буни рад этганди.
2019 йилда эса «Ўзбекистон ҳаво йўллари» Boeing 787 Dreamliner самолётларини сотувга қўйганлиги ҳақида хабарлар тарқалган, бироқ компания ушбу хабарларни ҳам рад этган. Ўшанда Uzbekistan Airways мамлакатда эксплуатацияда бўлган Boeing 787 самолётларининг нархи 115 миллион АҚШ долларидан бошланишини қайд этиб ўтган.
Маълумот учун, Uzbekistan Airways 2018 йилда 239 миллион долларга Boeing 787-8 Dreamliner самолётини сотиб олган, 2020 йил авиакомпания авиапаркида бундай турдаги олтита самолёт бўлиши режалаштирилган эди.