Бразилия президенти Жаир Болсонару ўзида коронавируснинг белгилари кузатилаётганини маълум қилди. Бу ҳақда у ўзининг тарафдорлари билан президент қароргоҳи қаршисида ўтказилган учрашувда маълум қилди, деб хабар беради Estadao.
Болсонарунинг сўзларига кўра, унинг тана ҳарорати кўтарилган, шунингдек, ўпкасини магнит-резонанс томография қилдирган. МРТ ҳеч қандай касаллик аломатларини аниқламаган.
Президент коронавирусга тест топширган ва унинг натижаси 7 июль куни чиқади. Шунингдек, Болсонару гидроксихлорохин қабул қилишни бошлаган.
Бразилия президенти ўз тарафдорлари билан учрашувга ниқобда чиққан ва одамлардан ўзига яқинлашмасликни сўраган.
Эслатиб ўтамиз, март ойида Бразилия президентининг ёрдамчиси Фабио Вайнгартенда коронавирус аниқлангач, Болсонарунинг ўзи ҳам тест топширган эди. Дастлаб ОАВ Болсонарунинг тести ижобий чиққанини ёзган. Бироқ президентнинг ўзи буни «фейк янгиликлар» деб атаганди. Кейинроқ Болсонару иккинчи бор коронавирусга тест топширган ва унинг натижаси салбий чиққанди.