Самарқанд вилоятининг Пахтачи туманида яшовчи 3 йилдан буён I гуруҳ ногирони, сурункали буйрак етишмовчилиги ва анемия оғир даражаси ташхиси билан диспансер назоратида турган, 2017 йилдан буён доимий гемодиализ муолажасини олиб келган 63 ёшли бемор 2020 йилнинг 19 май куни вилоят кўп тармоқли тиббиёт марказига оғир аҳволда ётқизилган, дея хабар бермоқда Соғлиқни сақлаш вазирлиги.
Маълум қилинишича, ўтказилган таҳлиллар натижасида беморда COVID-19 инфекцияси тасдиқланган. 25 май, душанба куни беморнинг аҳволи ёмонлашган, бурундан ва ички қон кетиш белгилари пайдо бўлган ва реанимация бўлимига олинган. Бўлимда беморга шифокорлар томонидан белгиланган стандартлар асосида реанимацион ёрдам кўрсатилган.
Мавзуга доир: Ўзбекистонда коронавирусга чалиниш ҳолатлари 9 тага кўпайди. Касалланганларнинг умумий сони 3290 нафарга етди
Бироқ кўрсатилган реанимацион муолажаларга қарамасдан сунъий нафас олдириш аппаратида бўлган бемор ўткир нафас ва юрак қон-томир етишмовчилигидан вафот этган.
Бунгача
- 27 март куни Наманган вилоятида Умрадан қайтган қизидан коронавирус юқтириб олган 72 ёшли онахон миокард инфарктидан (унинг жанозасида қариндошларидан ҳеч ким иштирок этмаган);
- 28 март куни Тошкент шаҳрида ўзини уйда даволашга уринган 39 ёшли (эркак) шифокор коронавирус инфекциясидан;
- 7 апрель куни коронавирусга чалинган 40 ёшли эркак юрак ва ўпка етишмовчилигидан;
- 11 апрель куни эса хориж сафаридан коронавирусга чалиниб қайтган фарғоналик 59 ёшли аёл ўткир респиратор дистресс синдром, ўткир нафас етишмовчилиги ҳамда ўпка-юрак етишмовчилиги оқибатида;
- 14 апрель куни Наманган шаҳрида яшовчи 73 ёшли Ш. юрак қон-томир етишмовчилигидан;
- 18 апрель куни Тошкент шаҳрида 77 ёшли аёл коронавирус инфекцияси асоратлари — икки томонлама бронхопневмониянинг оғир кечиши, ўткир нафас етишмовчилиги ва ўпка шишидан;
- 22 апрель куни Наманган шаҳрида яшовчи 54 ёшли бемор (аёл) ўткир нафас ва юрак қон-томир етишмовчилигидан;
- 24 апрель куни Ангренда коронавирус инфекцияси тасдиқланган бемор ўткир нафас, ўпка-юрак ва полиорган етишмовчилигидан;
- 29 апрель куни Тошкентда 1959 йилда туғилган Г. исмли бемор ўткир респиратор дистресс синдром, ўткир нафас етишмовчилиги, ўпка-юрак етишмовчилигидан;
- 3 май куни Наманганда М. исмли коронавирус инфекциясини юқтириб олган бемор ўткир нафас ва юрак қон-томир етишмовчилигидан;
- 15 май куни Самарқандда коронавирусга чалинган Ў. исмли иккинчи гуруҳ ногирони ўткир нафас ва юрак қон-томир етишмовчилигидан;
- 17 май куни коронавирусга чалингани Сурхондарёда аниқланган сирдарёлик ҳайдовчи I. юрак қон-томир ва ўткир нафас етишмовчилигидан;
- 18 май куни коронавирусга чалинган самарқандлик бемор юрак қон-томир ва ўткир нафас етишмовчилигидан Тошкентда вафот этди.
Маълумот учун, 26 май соат 17:00 ҳолатига кўра, Ўзбекистонда коронавирус инфекциясини юқтириб олиш билан боғлиқ 3281 та ҳолат аниқланган. 26 май соат 19:50 ҳолатига кўра беморларнинг 2636 нафари соғайиб, реабилитацияга кузатилган.
Изоҳ (0)