Ўзбекистонда коронавирус инфекцияси билан касалланганлар сони 26 март 11:00 ҳолатига 65 нафарни ташкил этмоқда. Бу ҳақда Соғлиқни сақлаш вазирлиги матбуот хизмати хабар берди.
Аввалроқ Саудия Арабистонида Умра сафарида бўлиб қайтган фарғоналик фуқарода коронавирус аниқлангани ҳақида хабар берилган эди. Сўнгги маълумотларга кўра, унинг турмуш ўртоғи, икки нафар фарзанди ва келини ҳам коронавирусга чалинган. Улар айни вақтда Фарғонадаги юқумли касалликлар шифохонасида даволанмоқда.
«Яна бир бемор Тошкент вилоятидан бўлиб, айни пайтда у Вирусология илмий текшириш институти клиникасида даволанмоқда», — дейилади Соғлиқни сақлаш вазирлиги ахборотида. Вазирлик ахборотида бу бемор касалликни айнан кимдан юқтирганига, хорижда бўлган-бўлмаганига аниқлик киритилмаган.
Аввалроқ Тошкентдаги Вирусология институти клиникасида даволанаётган коронавирусга чалинган беморлар орасида Тошкент шаҳридан ташқари Навоий, Самарқанд, Қашқадарё ва Тошкент вилоятларида яшовчи фуқаролар борлиги, икки бемор Фарғона вилояти юқумли касалликлар шифохонасига ётқизилгани, 60-бемор эса Наманган вилоятида аниқлангани ҳақида хабар берилганди.
Масъуллар 24 март куни беш нафар беморда коронавирус касалллиги белгилари йўқолгани, улар ўзини яхши ҳис қилаётгани ҳақида, 25 март куни эса тўрт нафар беморнинг аҳволи оғирлиги, 13 нафар беморда эса ўпка яллиғланиши — пневмония аломатлари кузатилаётгани ҳақида баёнот берган эди.
Дастлабки 49 беморнинг 19 нафари эркак, 30 нафари хотин-қиз, шунингдек, 4 нафари вояга етмаган болалар эканлиги айтилган эди. Уларнинг тўрт нафари 0—9 ёшгача, бир нафари 10—19 ёшгача, 27 нафари 20—40 ёшгача, етти нафари 40—50 ёшгача ҳамда, тўрт нафари 50—59 ёшгача ва олти нафари 60—70 ёшгача бўлган фуқаролардир.
Маълумот учун, Ўзбекистонда коронавирус тарқалишига қарши кучайтирилган чоралар кўрилмоқда — пойтахт Тошкент 24 мартдан бошлаб ёпилган, мамлакат бўйлаб деҳқон бозорларидан бошқа барча бозорлар фаолияти тўхтатилган, тўй ўтказиш тақиқланган. 25 мартдан бошлаб кўчада ниқобсиз юрганлар жаримага тортилмоқда.
Изоҳ (0)