Тожикистон президенти Эмомали Раҳмон 1 сентябрь куни Ўзбекистон Президенти Ислом Каримовга табрик телеграммасини йўллади. Бу ҳақда, Тожикистон президенти матбуот хизматига асосланиб, «Nm.tj» хабар бермоқда.
«Халқларимизни боғлаб турувчи мустаҳкам дўстлик ва қўшничилик муносабатлари, тарихан шаклланган маънавий-маданий алоқалар давлатлараро мулоқотнинг муваффақиятли ривожи учун ишончли асос бўлиши керак», — дейилади Тожикистон президентининг Ўзбекистон мустақиллигининг 24 йиллиги муносабати билан йўллаган табрикномасида.
Раҳмоннинг сўзларига кўра, Тожикистон «кўп тармоқли ўзбек-тожик ҳамкорлигининг тўхтовсиз ривожига катта эътибор қаратади ва унинг янада ривожланиши ҳамда аниқ мундарижага эга бўлиши учун ҳаракат қилади».
«Сўнгги йилларда икки томонлама муносабатларда кузатилаётган ижобий ўсиш унинг кейинги ривожи хусусида умид уйғотади. Мамлакатларимиз ўртасидаги ўзаро манфаатли муносабатларни янада кенгайтириш ва чуқурлаштириш учун имкони бор барча чораларни ишга солишга тайёр эканлигимизни алоҳида қайд этишни истардим. Халқларимиз ўртасидаги кўп асрлик дўстлик қадриятлари мустаҳкамланиши ва бойиши учун Сиз билан бирга барча кучни сарфлашга тайёрман», — деб ёзади Эмомали Раҳмон.
Тожикистон раҳбари «Ўзбекистоннинг ривожланиши йўлида» мустаҳкам соғлиқ, бахт ва янги муваффақиятлар, «дўст Ўзбекистон халқига эса тинчлик ва фаровонлик» тилаган.
Изоҳ (0)