Ўтган йилнинг июнь ойида 1993 йилда туғилган йигит ижтимоий тармоқлар орқали бир қиз билан танишиб, ушбу танишув улар ўртасида секин-аста ишқий муносабатга айланди, деб ёзади «Ҳуқуқ» газетаси.
Уйига тез-тез ташриф буюраётган йигитга аввалига унчалик аҳамият бермаган қизнинг онаси кейинчалик уларнинг муносабатларига эътироз билдира бошлайди. Бир сафар йигитга қизини тинч қўйишини, уйига бошқа келмаслигини айтиб, уни ҳайдаб юборади.
Ана шундай кунларнинг бирида йигит эндигина 19 ёшга кирган коллеж талабаси бўлган бошқа қиз билан танишиб қолади. Устамон йигит уни ҳам қўлдан чиқармай, бир вақтнинг ўзида икки қиз билан муносабатларини давом эттиради. Бир гал иккинчи қиз йигитнинг телефонида биринчисининг турли ҳолатларда тушган расмларини кўриб қолганида, «Менга нисбатан қилган муомаласи учун унинг онасидан ўч олишда ушбу расмлардан фойдаланаман», дея қизни ўзига шерик қилиб, ўзаро жиноий тил бириктиради.
Жиноий режага биноан йигит қизнинг бир нечта расмларини чиқартириб, конвертга солади ва унинг онасига жўнатади. Бундан мақсад, йигит шу йўл билан қизнинг оиласидан пул ундирмоқчи эди. Расмлар қизнинг хонадонига етиб борганини билгач, йигит қизнинг онасига қўнғироқ қилади ва ушбу расмларни интернетда тарқатиб, уларнинг оиласини, қизини қариндош-уруғлари, маҳалла ва таниш-билишлари орасида шарманда қилиш билан қўрқитиб, ундан 3 минг АҚШ доллари миқдорида пул талаб қилади.
Чорасиз қолган она мазкур ҳолатларга қонуний чора кўришни сўраб туман ИИБга ариза билан мурожаат қилди. Ҳолат юзасидан ўтказилган тезкор тадбирда товламачилар қизнинг онасидан 100 АҚШ доларини олаётган вақтда жиноят устида қўлга олинди. Жиноят ишлари бўйича Мирзо Улуғбек туман суди товламачилик билан пул топишни ният қилган йигитга 5 йил муддатга озодликдан маҳрум этиш жазосини тайинлади. Унинг шериги бўлган қиз ҳам тегишли жазосини олди.
Изоҳ (0)