1 декабрдан иш бошлаши кутилаётган Universal Mobile Systems (UMS) мобил оператоти «Uyut Mebel Servis» МЧЖга ўзининг Тошкент шаҳридаги бош офиси учун мебель-жиҳозлар буюртма берди.
Мебель фабрикаси вакилларининг «Дарё»га маълум қилишича, айни пайтда мобил оператор билан бу борада шартнома тузиб бўлинган ва яқин орада тегишли маблағ ўтказиб берилиши кутилмоқда.
«Fotofakt.uz» сайтида қайд этилишича, UMS мобил алоқа оператори интернетда «ums-mebel.uz» доменига кўчиб ўтган «Uyut Mebel Servis» масъулияти чекланган жамиятининг йирик буюртмачисига айланган. Унга кўра, ушбу мебель фабрикаси янги алоқа операторининг Ўзбекистондаги барча асосий дилерлик марказлари (тахминан 600 тага яқин)га ўз маҳсулотлари – мебелларини етказиб бера бошлаган.
Бироқ «Uyut Mebel Servis» директори ўринбосари Шавкат Шарафутдиновнинг «Дарё»га маълум қилишича, шартнома фақат Тошкент шаҳридаги бош офисига жиҳозларини етказиб бериш учун тузилган. Янги оператор катта миқдордаги мебель сотиб олиш учун эса 2015 йилда тендер эълон қилиши айтилган.
Бу ҳақда Universal Mobile Systems расмий маълумот бермаган.
Аввалроқ Ўзбекистонда янги очиладиган UMS алоқа оператори www.umsuz.uz ва www.myums.uz доменларини рўйхатдан ўтказгани, янги операторнинг сайтлари айнан шу доменларда жойлашиши мумкинлиги ҳақида хабар берилган эди. www.ums.uz домени эса банд бўлиб, у «Uyut Mebel Servis» МЧЖга тегишли эди. UMS алоқа оператори очилиши ҳақида хабарлар пайдо бўлганидан бери одамлар адашиб шу сайтга кира бошлаган. Натижада сайт кўрсаткичлари деярли тўрт марта ўсиб кетган.
Шунигдек, мебель фабрикасига аввал тегишли бўлган ums.uz домени Universal Mobile Systems тасарруфига ўтгани, бироқ янги оператор бу доменга ҳали ўз сайтини кўчирмагани ва ушбу доменда ҳалигача «Uyut Mebel Servis» сайти жойлашгани хабар берилган эди.
Эслатиб ўтамиз, «МТС-Ўзбекистон» ўрнига ташкил қилинган UMS мобил алоқа оператори ўз тижорий фаолиятини 2014 йил 1 декабрдан бошлаши кўзда тутилган.
Изоҳ (0)