O‘zbekistonning e-sportchilari FIFA simulyatori (kompyuter o‘yini) bo‘yicha Electronic Sports World Cup (ESWC — 2014) jahon kubogi final bosqichida qatnashadi. Bu haqda InfoCOM.UZ xabar berdi.
O‘zbekistonda e-sport chempionatlarini o‘tkazishda bir necha yillik tajribaga ega InfoCOM.Uz ESWC — 2014 tashkilotchilari bilan mazkur xalqaro turnirda o‘zbekistonlik e-sportchilar ham ishtirok etishi haqida shartnoma imzoladi.
O‘zbekiston ESWC’da ilk bor qatnashayotgani uchun hozircha unga turnirda bitta o‘rin band qilingan.
Jahon kubogi finalida ishtirok etadigan o‘zbekistonlik e-sportchining ismi avgust—sentabr oylarida bo‘lib o‘tadigan ESWC — 2014 FIFA Uzbekistan saralash turniridan so‘ng ma’lum bo‘ladi. Ayni damda mazkur chempionatga tayyorgarlik ishlari ketmoqda.
E-futbol bo‘yicha jahon kubogining final bosqichi 2014-yil 29-oktabrdan 2-noyabrgacha Fransiya poytaxtida Parij o‘yinlar haftaligi (Paris Games Week) doirasida bo‘lib o‘tadi.
Ma’lumot uchun, ESWC 10 yildan beri o‘tkazib kelinmoqda. Turnirda 50 dan ziyod mamlakat qatnashadi.
Izoh (0)